Daaglikse Heuningdruppels 2024
 


... soeter as heuning, as druppels uit 'n heuningkoek (Ps 119:11)

Die daaglikse heuningdruppels is ook op ons Facebook-groep. Klik hier:

Duplisering en verspreiding word toegelaat sonder veranderinge en met verwysing na die outeur (Wilna / Willem Botha) en webruimte (www.heuning.co.za)
Lees gerus enige van ons onlangse skryfsels in die tabel hieronder .....
Die Here sal vir my sorg...
Jip, Hy sê Hy sal, op vele plekke in die Bybel, en Hy sê op hordes plekke ons moet ons nie bekommer oor môre nie. En ek glo dit en beleef dit.
Maar ek begin meer en meer sukkel om my kop heeltemal om hierdie gedagte te kry. Hoe? In alle omstandighede? Wat is my eie verantwoordelikheid rondom hierdie saak?
Op ons ouderdom begin kuiers met ons vriende (wat almal omtrent so oud soos ons is), gewoonlik op dieselfde manier. Praat oor werk, kinders, kleinkinders, skinder bietjie oor dit en dat (en hierdie en daardie mense), en dan raak die gesprek ernstig en bevat die volgende elemente: kwale, medikasie, brille en pille (dit val nie altyd onder tradisionele medikasie nie, want boererate speel ook 'n rol) en dan kom die onvermydelik vraag: Wanneer gaan jy af? Dit beteken natuurlik wanneer gaan jy aftree, want ons is nou "daar". Die meeste mense moet om en by op 65 "klaarmaak".
Wat gaan julle doen? Gaan julle reis? Die kinders oorsee besoek? Die land platry? Dalk 'n skuif maak na 'n kleiner (peperduur) plekkie? 'n Sport of stokperdjie beoefen?
En dan, meesal, word die realiteit van die situasie baie versigtig op die tafel gesit. Ons kan dit nie regtig bekostig nie. Lewenskoste is te duur. Wat van ons medies?
Dis altyd dieselfde. Vir die meeste mense is aftreedag onwelkom, vol vrese en met tonne onsekerhede, want die finansies het nie gewerk soos dit belowe is deur die raadgewer nie.
Die mense se lewe loop min of meer soos volg: Die eerste 20 jaar (min of meer) word jy groot, gaan skool, studeer en begin met 'n loopbaan. Die volgende 45 jaar werk jy, verander dikwels van beroep en werkgewer, en werk hopelik jou tonne skuld af.
En dan kom die skok as jy besef jy gaan heel moontlik dalk nog 25 jaar leef. En jy moet leef met dít wat jy in 45 jaar weggesit het, net om te besef dat die meeste mense dit nie kan doen nie. Gewoonlik sê die meeste mans hulle moet dalk iets by die huis begin vir ekstra inkomste, maar dan is dit ongelukkig 10 jaar te laat, want dis hoe lank dit neem om 'n oornag sukses te wees.
Nou ja, dit som min of meer die gesprekke van mense wat so oud soos ek is op.
En dan, bykans deur die bank, kom die versigtig optimistiese gedagte na vore: Maar ek vrees nie, want die Here sal vir my sorg.
Ek gebruik dieselfde woorde.
In 'n baie kort tydjie was ek in vele van hierdie gesprekke met vriende, asook ander mense wat nie so naby my is nie.
En hier is die dilemma waarmee ek sukkel. Hóé gaan die Here vir my sorg? Gaan Hy op misterieuse maniere geld in my rekening laat beland? Dalk geld waarvoor ander mense werk? Ander mense soos my kinders?
Gaan Hy my versorg binne die raamwerk van my gerieflike lewe in my gerieflike huis? Gaan ek so gesond bly dat ek nie vir mediese uitgawes voorsiening hoef te maak nie?
Of gaan Hy my versorg soos wat Hy my huishulp versorg? Vieruur in die oggend opstaan om 5 uur die taxi werk toe te neem om ander mense se huise skoon te maak? Sy bid sekerlik ook vir versorging.
Gaan ek dalk my gerieflike huis verloor en met 'n moeilike lewe tevrede moet wees?
Kyk wat sê die Bybel hieroor, kort en kragtig.
1 Tim. 6:8 "As ons dan kos en klere het, moet ons daarmee tevrede wees."
Net kos en klere Here? Wat van my gerief en weelde?
Ja ek glo die Here sorg vir ons, maar dit sal dalk anders wees as wat ons dink.
'n Predikant het eendag hierdie volgende woorde gesê en dit sal my vir altyd bybly:
Doen álles (ALLES) wat jy kan en moet doen, en begin eers daarna bid.
Ek het vele kere in my lewe gesien dat mense álles verloor wat hulle gehad het, en uiters dankbaar is vir die bietjie wat oor is. So min dat selfs kos en klere 'n luukse is.
Ja, die Here sal sorg, maar dalk effe anders as waarop ek hoop. Maar ek hou aan Hom vas, want Hy is al wat ek nodig het. ~ Willem Botha, 09/09/2024
Ek kan jou 'n brief gee...
 'n Baie bekende spreekwoord wat jy gebruik as jy 'n sterk punt wil oorbring. So ietsie van dat die geskrewe woord vas staan en nie kan uitgewis word solank as wat daar 'n kopie daarvan bestaan nie. In ons jong dae was dit maar die beste vorm van kommunikasie wanneer daar nie 'n telefoon beskikbaar was nie. In die weermag het ons nie toegang gehad tot telefone in die basis nie (ons het vir twee jaar in 'n tentbasis buitekant Potchefstroom gebly) en ons moes staatmaak op briewe vir kommunikasie. Maar nou ja, in daardie tyd kon jy 'n brief Dinsdag skryf en jou ma het hom in Pretoria gehad voor die naweek. Goeie ou dae toe dinge nog gewerk het.
 Maar o wee, daardie selfde vorm van kommunikasie was nogal 'n straf, want terwyl ons basiese opleiding gedoen het, het jy 'n klomp push-ups gedoen as jy 'n brief kry. Ja, in die weermag is "push-ups" suiwer Afrikaans, tesame met ander woorde wat ek nie hier kan noem nie.
 Maar my pa was baie ondeund, en as my ma vir my 'n brief skryf het hy dikwels die brief vrot van die parfuum gespuit en snaakse afkortings agter op die koevert geskryf. Dinge soos ILU (I love you) en ander woordjies wat ek glad nie kan onthou nie. Een was ELVIS, maar ek kan nie onthou wat dit beteken het nie. Dan het jy ge-suffer (ook Afrikaans) met 50 push-ups vir elke woordjie.
 'n Brief wat op papier geskryf was, was baie baie kosbaar.
 Stap so bietjie saam met my terug in tyd, in die tyd toe Paulus in die tronk was en briewe vir verskeie gemeentes geskryf het. Hoe het die pos sisteem gewerk? Daar was tog nie n rooi posbus waarin hy die brief gegooi het nie, en hy het waarskynlik daardie brief aan een van die bewaarders gegee, en dan moes daardie brief sy weg baie ver vind om by die gemeentes uit te kom. Dalk oor kontinente heen, en van een hand na die ander, totdat dit by die ontvanger uitgekom het. Dit was natuurlik geskryf op mediums wat ons nie meer vandag gebruik nie, en nie een van daardie oorspronklike briewe bestaan meer nie, want dit het vergaan. Ons het vandag kopieë van kopieë van daardie briewe. Hoeveel briewe het hy geskryf wat nooit die hele pad gegaan het nie? Soos jy weet het Paulus 13 van die 27 boeke in die nuwe testament geskryf, en daardie woorde staan vandag vas. Want Paulus het sekerlik gesê (Ek kan vir jou 'n brief gee...)
 Dink net vir 'n oomblik hoe die Bybel gestalte gekry het. Meer as 40 skrywers het oor 'n tydperk van meer as 1600 jaar daardie dokumente geskryf, in drie tale (Grieks, Hebreeus en Aramees), op drie kontinente (Afrika, Europa en Asië). Die meeste het mekaar nie geken nie en het meesal nie in dieselfde tyd geleef nie, maar hulle het saam geskryf aan God se liefdesbrief wat aan jou en my gerig is. Daar moes bonatuurlike wonderwerke plaasgevind het om te verseker dat daardie dokumente se inligting behoue gebly het, net spyte daarvan dat nie een enkele oorspronklike dokument vandag meer bestaan nie. Die kopiëring daarvan was met groot sorg met die hand gedoen, onder streng toesig deur geletterde mense om te verseker dat ek en jy vandag God se boodskap 100% akkuraat kan lees.
 Daar was veel ander boeke (die apokriewe boeke) wat nie in die Bybel opgeneem is nie. Die Bybel soos ons hom vandag ken is reeds in die jaar 397 na Christus saamgestel soos wat dit vandag bestaan. Let wel, meer as 200 jaar voordat Mohammed die Koran geskryf het.
 Nietemin, ek is nogal heel gemaklik om te aanvaar dat die Here sy woord in stand hou, want daardie liefdesbrief wat bestaan uit 66 boeke in twee Testamente is neergeskryf, en niemand kon nog ooit iets daarvan verkeerd bewys nie.
 My vriend, ek dink nogal die Here wil vandag vir jou sê: Ek is lief vir jou, en ek sal jou red as jy jou hart vir My gee, Ek kan vir jou 'n brief gee...  ~ Willem Botha, 26/08/2024

Sleg, sleg, sleg, is die lewe!
Dinge ruk handuit, alles val uitmekaar, almal is skelm, jy vertrou niks en niemand.
So gaan dit as jy sukkel met daardie halfvol / half leë glas.
Maar die wolkies het maar altyd 'n silwer randjie, as jy dit wil sien.
Daar is baie pyn in hierdie wêreld, maar daar is baie meer genesing.
Daar is baie moeilikheid en swaarkry, maar daar is baie meer vrede.
Daar is baie haat, maar daar is baie meer liefde.
Daar is baie sonde, maar daar is baie meer genade.
Daar is baie vrees, maar daar is baie meer vryheid.
Daar is baie donkerte, maar daar is baie meer lig.
Daar is baie donker wolke, maar daar is baie meer visie.
Daar is baie dinge wat vergaan, maar daar is baie meer lewe.
Ek dink hierdie dinge is vir die meeste mense waar, maar nie vir almal nie. Daar is egter vele mense wat net nie meer die silwer randjie om die donker wolk kan sien nie, omdat die negatiewe invloede net eenvoudig te groot is.

Hierdie woorde kom uit die liedjie "Outrageous grace".
Hier is die refrein:
"Oh outrageous grace, oh outrageous grace
Love unfurled by heaven's hand
Oh outrageous grace, oh outrageous grace
Through my Jesus I can stand"
Inderdaad, deur die genade van Jesus kan ons staande bly. Kyk net bietjie nuut. ~ Willem Botha, 19/08/2024
Hoe was jou dag? Vol drama en stress? Reg om batterye te herlaai? Baie mense sien glad nie uit na 'n werkdag nie, en dan nog minder na die nag wat voorlê.
Wat is die slaap 'n wondersoete ding... 'n Bekende gedig deur D. F. Malherbe. Slaap, die beloning na 'n goeie dag se werk.
Na 'n dag se geswoeg en sweet met allerlei moeilikhede is dit darem lekker om net so in die vergetelheid weg te sak. As jy so gelukkig is soos ek slaap jy voor jou kop die kussing raak, maar dis nie vir almal beskore nie. Sommige mense rol rond oor bekommernis oor hulle eie sake, en party mense rol rond oor dinge wat dalk nie eers hulle eie probleem is nie.
Dan is daar nog ander wat wakker lê oor verkeerde dinge waarmee hulle besig is, dalk dinge wat by die werk onder verdenking is, of sommer 'n lewenswyse wat net op kwaad uit is. Hulle slaap sleg.
Maar as jy dinge doen soos jy moet, hard werk en 'n aanwins vir jou werkgewer is, en jou huishouding en sake alles goed en eerlik hanteer, slaap jy goed. Ek hoop dis vir jou waar, want dan is hierdie teks net vir jou.
Ps 4:9 "Nou sal ek onbesorg gaan lê en dadelik aan die slaap raak, want, Here, U alleen laat my veilig woon... " ~ Willem Botha, 12/08/2024
Wat maak jou gelukkig?
Dit kan nogal 'n moeilike vraag wees, of hoe? Ons is tans besig by ons gemeente met 'n reeks oor hierdie vraag. Wat maak jou gelukkig?
Een van die boodskappe was kort en bondig: Niks maak jou gelukkig nie. Niks bedoelende geen goeters maak jou gelukkig nie, definitief nie geld nie, hoewel mens nogal ernstig ongelukkig kan raak as jy in erge geldnood verkeer. Maar ons kan natuurlik lekker rondom hierdie punt redeneer. Daar is vele redes hoekom geld mense ongelukkig kan maak.
Te min geld, wanneer jy nie jou verpligtinge kan nakom nie, is 'n groot bron van ongelukkigheid. Maar die teenpool is ook waar, want te veel geld skep nog groter probleme. Ek ken baie mense wat baie welaf is en geen tekort het nie, en geld bymekaarmaak wat hulle nooit sal kan opgebruik nie, maar nie EEN van hulle het genoeg nie. Sulke mense sloof hulle meer en meer af, hulle slaap sleg omdat hulle bang is hulle gaan dit verloor, en daardie welvaart maak sommiges net meer ongelukkig soos toe die hond uiteindelik die bus vang.
Natuurlik is daar niks fout met welvaart nie, en as iemand dit eerlik verdien het kom dit hulle toe, maar daardie eerlike faktor kan nogal lekker gebruik word. Soms hoef jy nie te jok oor dinge nie, jy hoef net so bietjie spaarsamig met die feite en die waarheid om te gaan.
Die slotsom in die kerk se boodskappe is dat geluk nie lê in goedere nie, maar eerder in verhoudinge. Dinge (goeters) maak jou baie kortstondig gelukkig, maar verhoudinge kan vir altyd bly. Hopelik!
'n Mens se onrealistiese verwagtinge, jou loer na ander wat meer het se goete, is 'n groot probleem. Wat sal sommige mense nie alles doen om daardie onrealistiese verwagtinge te bevredig nie? Hoe ver sal mense gaan? Soms tot misdaad en uiteindelik die tronk, is nie vergesog nie.
Die woord "vrede" kom voor in die woord "tevrede".
Hierdie foto is van 'n man wat op die strand in Ballito woon, in 'n tentjie half onder 'n voetganger bruggie. Ons het hom al vir 'n paar jaar daar gesien as ons daar vakansie hou. Hy pla niemand nie en hy het 'n hond wat saam met hom bly. Dan wonder ek, wat is sy storie? Waar het sy paaie geloop? Wat is sy agtergrond? Was hy eens op 'n tyd suksesvol? Is daar mense wat verantwoordelik is vir sy situasie? Of het hy net self hierdie pad gekies en is hy gelukkig? Wil hy iets anders hê in die lewe, of is hy tevrede? Betaal geen belasting nie, hoegenaamd geen gejaagde lewe nie, skuld waarskynlik niemand niks en niemand skuld hom niks. Aan die een kant lyk dit so idillies.
Nou vra ek jou die volgende: hoe was jou dag? Opgestress? Mense jou in die afgrond in afgerem? Waardeer niemand jou meer nie? Glad nie lus vir more nie? Haat jou baas? Haat jou kollegas? En dalk selfs 'n paar familielede? In der dagen sat?
Hmmm, ek dink baie mense wat nou hier lees voel so. En boonop sonder genoeg finansies. Dis wanneer die vraag opkom: Vir wat?!
Nou ja, dalk wil jy ook sommer oppak en op daardie strand by Ballito onder die brug jou intrek gaan neem.
Maar jy sal nie, want jou goeters hou jou vas, jou besittings is net te belangrik, want dit bring gerief in jou lewe. En jou vrese maak dat jy eerder alles opvreet sodat die pensioen en medies betaal kan woord. En daai vleisie en 'n biertjie vir 'n braaitjie. En wie wil nou kêffie toe stap as jy kan ry?
Daar is hoeka 'n 5% verhoging op die horison, en ek skuld myself mos lekker nuwe wiele. Vir alles wat ek moet opvreet. Dan maak ons soveel skuld dat ons 10% dieper in die moeilikheid kom.
Dan begin alles van voor af. Ai tog, die lewe is so swaar.
Ek kry mense bitter jammer wat net nooit ooit gelukkig kan wees nie.
Soek jy antwoorde? Gaan lees die boeke Spreuke en Prediker, alles is daar opgeskryf, want ons ou probleempies is niks nuuts nie.
Maar moet om vadersnaam nie jou heil gaan soek in voorspoed teologie nie, die Here is nie jou jackpot wat net 'n gebed ver is nie, Dis soos om te trou vir geld. Dis boonop ook die grootse piramide skema op aarde.
Nee wat, net een woord: Tevrede. ~ Willem Botha, 01/08/2024
Genesis 1:0
Jip, reg gelees, Genesis een vers nul, 'n gedagte wat 'n vriend van my wat baie diep kan dink, nou die dag noem en wat my ook ernstig aan die dink gesit het.
"In die begin het God die hemel en die aarde geskep." (Gen. 1:1)
Hierdie vers het in my lewe my waarskynlik meer laat dink as enige ander vers. Hoe het God geskep? Hoe lank gelede? Wat was die model? Was dit 'n oerknal? Kon alles werklik uit 'n sogenaamde "singularity" ontstaan? Het God met tyd die heelal tot stand gebring, of was alles net in 'n oogwink daar? Bykans geen modelle van die verlede werk meer nie, en die oerknal model is aan so baie voorwaardes gekoppel dat hy nie meer staande bly nie. Is daar iets soos "dark matter"? Waar is dit?
Maar... as jy dink hierdie is moeilike begrippe om te verstaan, probeer bietjie sin maak van Gen. 1:0
Daar staan nie in Gen. 1:1 "In die begin het God Homself, die hemel en die aarde geskep" nie.
Maar wat was voor vers 1?
Wel, ek het vir jou 'n heerlike verrassing, want ek het vandag Gen. 1:0 opgespoor, in die Bybel! En daarmee saam het ek 'n heerlike tweede verrassing gekry.
God was daar, in Gen. 1:0, en jý was ook! Die grootsheid van hierdie enorme heelal, die onverstaanbaarheid daarvan, en die verwondering van dit, is nie naastenby so groot soos vóórdat God die fisiese, materiële heelal geskep het nie. Soos jy weet het tyd saam met Gen. 1:1 ontstaan, vóór dit was tyd oorbodig, want Hy het nie tyd nodig gehad nie. Wat is tyd in elk geval? Dis net waarneembaar op aarde omdat dag/nag en die seisoene tyd waarneembaar maak.
Waarmee was God dan besig in Gen. 1:0? Dit lyk my nogal of Hy besig was met iéts, want Gen. 1:0 word baie duidelik, sonder omhaal van baie woorde, in die volgende teks genoem.
"Hy het ons wat aan Jesus behoort, gekies nog lank voor die wêreld gemaak is." (Ef. 1:4)
Jy, ja jý, was in sy gedagtes, Hy het jou daar al uitgekies, al verstaan niemand dit nie. Toe Gen. 1:1 plaasvind, was jou lewe en bestaan alreeds haarfyn beplan. En op jou geboortedag, het Gen. 1:0 ten volle sy gestalte gekry.
Hoe kan jy aan jou doel op aarde twyfel, hoe kan jy twyfel of Hy lief is vir jou en jou haarfyn beplan het in Gen. 1:0?
Jou beplanning is lank voor die grondlegging van die aarde afgehandel, en jou materie is met die skepping eers gemaak. Dit het later, baie later, gestalte gekry in jou liggaam. Gaan lees gerus meer daaroor op die internet. Stof tot stof...
Jou siel is ook in Gen. 1:0 geskep, dit het later deel van jou fisiese liggaam geword, en dit gaan terug na God toe as jou lewe hier op aarde eindig.
"... die tyd wanneer die stof na die aarde toe terugkeer soos dit was, en die gees na God terugkeer wat dit gegee het." (Pred. 12:7)
Ek verlustig my in hierdie gedagte.
Die volgende gedagte het my egter verstom. Genade, daardie genade wat maak dat jy gered kan wees, het ook reeds in Gen. 1:0 tot stand gekom. Lees weer Ef. 1:4, dink daaraan, en dank die Here daarvoor. ~ Willem Botha, 24/07/2024
Het jy al gewonder of die Here 'n doel het met jou op aarde? Of hoekom jy ooit gebore is? En wat dit gekos het om jou nou, hier aan die lewe te kry? Ons dink so dikwels dat ons almal ouers het en hulle moes natuurlik aan jou geboorte skenk.
Jy het sekerlik al hierdie prentjie gesien wat nou so gewild is op sosiale media. Hoe meer ek hieraan dink, hoe meer tref dit my dat ek nie net 'n ongeluk is wat in 1959 gebeur het nie.
Die Botha stamvader het in 1653 in Suid-Afrika aangekom, en sedertdien moes bykans 4000 mense leef en oorleef het, tot op 'n punt waar hulle kinders gekry het. Baie van hulle moes dikwels bitter swaarkry oorleef, sommige het dalk die dood in die oë gestaar, en dit dikwels net net vrygespring. Die meeste het in God geglo en hulle hoop op Hom gesit, die meeste het by tye gesukkel om sy stem te hoor, vele van hulle het dalk by tye diep getwyfel of Hy hulle gebede hoor. Ek glo sommiges het gesukkel om swanger te raak terwyl daar sonder twyfel baie ongewenste swangerskappe was. Ek dink baie van hulle het met baie armoede die volgende geslag grootgemaak, daar was dikwels honger geslaap, baie was armblankes wat van die hand na die mond geleef het. Daar was egskeidings, alleen-ouers en vele het by die geboorte van 'n kind amper die baba verloor.
Maar daardie bykans 4000 mense moes ELKEEN oorleef het en die volgende baba grootmaak. Indien net EEN ENKELE een van daardie 4000 nie oorleef nie, was jy nie vandag hier nie. Elke een se bloed vloei in jou are, en elke een se bloed vloei in jou kinders en jou nageslag se are.
Jy sal eendag in die hemel vele van hulle weer ontmoet (die wat gered is), hoewel ek nie dink dat dit per definisie dan sal saak maak nie.
Die Here was intens lief vir elke een. Hy het 'n plan met elke een se lewe gehad, soveel so dat die Here jou SO waardig geag het, dat Hy almal (elke een) beskerm het sodat jy gebore kon word.
As dít jou nie spesiaal laat voel nie, sal niks dit regkry nie. Al was daar dalk onbeplande swangerskappe, het die Here jou deur elke een van daardie mense gevorm. Jy is jy omdat God jou NOU hier wou hê. Hy het 'n plan met jou, al glo jy dit nie eers nie. Hy is jou Here al glo jy dit dalk nie. Hy wil jou by Hom in die hemel hê, of jy dit glo of nie. Hy wil (en kan) jou nou gebruik, al glo jy dit nie.
Vier duisend mense in vier honderd jaar was nodig sodat die Here jóú kon skep. En jy is die kroon van sy Skepping.
Wat 'n wonderlike gedagte! ~ Willem Botha, 17/07/2024
As jy glo dat slegte goed nie met Christene gebeur nie, moes die Here absoluut geen gevoel gehad het vir Johannes die Doper nie, want sy kop is sinneloos afgekap. (Matt. 14)
As jy glo dat Ps 91 bedoel dat geen onaangename dinge soos dood, siekte of ontydige goed jou sal tref nie, moes die Here vir Paulus gehaat het. Want hy het skipbreuk gely, honger gaan slaap, hy was vele kere aangerand oor sy geloof, en selfs in die tronk gegooi, onskuldig. (2 Kor.11)
As jy glo dat die mensdom jou sal vereer en jou geensins bedreig nie omdat jy die Here aan jou kant het, moes Stefanus baie laag op die Here se liefdes lysie gewees het, want hy is juis daarom met klippe doodgegooi. (Hand. 7)
As jy glo dat jy ryk moet wees omdat jy 'n Christen is, moet jy weer die verhaal gaan lees oor Lasarus en die ryk man. (Luk. 16)
As jy dink dat jou finansies en goeie dade vir jou 'n spesiale plekkie in die hemel gaan besorg, moet jy weer die verhaal gaan lees oor die ryk jongman wie se rykdom in sy pad gestaan het om die ewige lewe te verkry. (Luk. 18)
Wees baie versigtig vir predikers wat vir jou die son maan en sterre beloof in ruil vir jou geld.
Wees versigtig vir mense wat hulleself as profete voordoen en voorspoed beloof, in besonder as hulle vir jou sê om die Here te herinner aan sy beloftes.
Dien die Here in afhanklikheid en vertrou dat Hy vir jou sal sorg, maar oppas dat jy nie sekere tekste totaal buite konteks aanhaal en misbruik nie. (Mat. 7 wat sê Vra en julle sal ontvang...)
Voorspoed teologie is al dikwels vergelyk met 'n piramide skema. ~ Willem Botha, 04/06/2024

SELFKASTYDING
Hoe genadig is God? Kon jy al ooit 'n greep kry op hierdie ding wat ons onvoorwaardelike genade en vergifnis noem? Ek dink as jy 'n ouer is, begin jy so ietsie verstaan van hierdie konsep van genade. Een oomblik wil jy jou tiener verwurg, maar lê hy vanaand in sy bed en slaap en jy kyk vir hom, smelt alles net weg. Môre spog jy die wêreld vol met hom. Dis genade.

Maar... as dit by God se genade kom, wil ons soms net nie hierdie ding vat nie, want dan wil ons aanhoudend offers bring in die vorm van selfkastyding. Kasty jy jouself ook soms so oor sonde?

Natuurlik is sonde nie 'n man se speelmaat nie, en natuurlik haat die Here dit, maar soms kasty ons onsself aanhoudend oor dinge wat Jesus klaar oorwin het. Jesus – die volmaakte offer – het reeds namens ons afgereken met sonde. As jy dit aanvaar het, en dit glo, is selfkastyding nie meer nodig nie.

Heb 10 : 1 – 14
Die wet van Moses is slegs 'n skadubeeld van die weldade wat sou kom, nie 'n werklike beeld daarvan nie. Voortdurend, jaar na jaar, word dieselfde offers gebring, en tog kan die wet dié wat die offers bring, nooit volkome van sonde vry maak nie. As dié wat offers bring, eens en vir altyd gereinig en nie meer van sondes bewus was nie, sou hulle immers opgehou het om offers te bring. Maar nou herinner die offers juis jaar na jaar aan die sondes, omdat die bloed van bulle en bokke onmoontlik die sondes kan wegneem. Daarom sê Christus met sy koms in die wêreld: "Dit is nie diereoffer en graanoffer wat U wou hê nie, maar die liggaam wat U My gegee het. Brandoffers en sondeoffers het U nie behaag nie! Toe het Ek gesê: Kyk, Ek het gekom, o God, om u wil te doen. In die boekrol is dit van My geskrywe." Eers sê Hy: "Diereoffers en graanoffers, brandoffers en sondeoffers wou U nie hê nie en het U nie behaag nie," hoewel hierdie offers deur die wet voorgeskryf word. Daarna sê Hy: "Kyk, Ek het gekom om u wil te doen." Hy skaf dus die eerste offers af om 'n ander offer in die plek daarvan te stel. Omdat God dit so wou, is ons vir Hom afgesonder deurdat Jesus Christus sy liggaam as offer gebring het, eens en vir altyd. Verder, elke priester staan dag vir dag sy diens en verrig, en bring elke keer weer dieselfde offers, wat tog nooit die sondes kan wegneem nie. Maar Jesus Christus het één offer vir die sondes gebring en vir altyd aan die regterhand van God gaan sit. Nou wag Hy daar totdat sy vyande aan Hom onderwerp is. Deur die één offer het Hy dié wat vir God afgesonder word, vir altyd volkome van sonde vry gemaak.

Eens en vir altyd skoon, sonder vlek of blaam. Moeilike konsep hierdie, juis omdat ons nie verstaan hoe onvoorwaardelik, en finaal, hierdie genade van God is nie. Dit is natuurlik nog moeiliker as jy tans in 'n situasie is waar jy swaarkry as gevolg van die konsekwensies van een of ander verkeerde keuse. En nog meer, as jy dalk volhard in verkeerde dinge.

Ek dink die meeste mense kan getuig dat hulle al gehuil het voor die Here oor hulle sondes. As hulle so sukkel om oorwinning daaroor te kry, of miskien ly a.g.v. die uitvloeisels daarvan. Mens moenie berou met selfkastyding verwar nie. Natuurlik moet mens berou hê oor jou sondes; daar moet ’n sondebesef kom, gevolg deur berou, dan tree God se vergifnis in. Selfkastyding is die proses waar mens dag na dag loop en tob oor dit wat jy verkeerd gedoen het. Dis wat die satan mos behaag.

In sommige lande sien jy tydens Paasfees hoe mense die Via de la Rosa naboots. Dan loop van die mans en slaan hulleself oor die rug met swepe dat die hale lê en die bloed uitloop, ter nagedagtenis aan die lydenspad wat Jesus geloop het. Edel gedagte, maar Jesus het deur baie erger dinge gegaan as om net liggaamlik gemartel te word. Hy het immers “ter helle neergedaal” en is deur Sy Vader verlaat. Daar is niks wat ons kan doen om Sy lyding te simuleer nie. En dis verseker ook nie nodig nie.

Maar... nou loop ons dag vir dag met selfkastyding as gevolg van skuldgevoelens. Het jy ook al gedink dat jou sondes te groot is vir die Here se vergifnis? Dink jy ook soms dat jy nie kwalifiseer vir genade nie? Miskien kyk jy na ander mense en dan dink jy hierdie persoon is 'n waardige kliënt vir vryspraak, maar jy ag jouself nie goed genoeg nie. Dis juis omdat ons nie goed genoeg is om die sondes te oorwin nie dat jy vir Jesus nodig het. Wie ken jy wat die wet volmaak kan onderhou? Kan jy enige name noem? Ek ook nie. Daarom het Jesus jou waardig genoeg geag om vir JOU te sterf.

Ek wonder nogal of Jesus dan dalk dink ... “Het ek dan verniet gesterf?”

Heb 10 : 17 – 18
Dan sê Hy verder: "Aan hulle sondes en hulle oortredings sal Ek nooit meer dink nie." Waar die sondes vergewe is, is geen offer daarvoor meer nodig nie.

Daar is nie meer skuldgevoelens nodig nie. Daar is nie eers meer 'n gedagte daaraan nodig nie, wat verby is, is verby. Maar die satan, die verleier en leuenaar, is nogal lief daarvoor om dit dag na dag voor jou kop te gooi. Moet wees, want dis immers al wapen wat hy teen jou het. So verpes hy ons dag vir dag, en so glo ons hom dag vir dag. Glo jy hom eerder as vir die Verlosser wat met alles klaargemaak het?

Die probleem van sondes is dat ons dikwels met die letsels daarvan sit en soms moet daar dalk straf daarvoor uitgedien word. Dis dan wanneer spyt met selfkastyding gepaard gaan, en dan glo ons nie dat Jesus ons vrygespreek het nie. Omdat Jesus reeds gemartel is, hoef jy jouself nie meer te martel nie.

Waar die sondes vergewe is, is geen offer meer daarvoor nodig nie.

Heb 10 : 5
Daarom sê Christus met sy koms in die wêreld: "Dit is nie diereoffer en graanoffer wat U wou hê nie, maar die liggaam wat U My gegee het.

Eintlik is hierdie teks die volle verduideliking van “Tetelestai”.
Hierdie teks is goed genoeg vir ALMAL, ook vir jou. Ook vir die moordenaar en verkragter, mits daar berou gekom het en klaargemaak is met die sonde. Niemand is te sleg nie, nie eers die man wat langs Jesus aan die kruis gesterf het nie.

Ons moet net ophou om goed genoeg te probeer voel, want Jesus was goed genoeg gewees.
Moenie loop met selfkastyding nie, want dit laat die persoon wat na jou opkyk vir antwoorde op Geestelike vlak, net verder struikel. As die kinders van Jesus dan nie kan oorborrel omdat hulle genade ontvang het nie, hoekom sal ander mense dit dan wil ontvang?

Geen marteling is meer nodig nie, want Jesus het namens ons die pad gestap en die volle prys betaal. En môre, as jy weereens struikel, gaan Jesus jou nie uittel op jou voete nie, Hy gaan Sy hand na jou toe uitsteek en se: “kom, staan op, ons probeer weer”. Jy hoef nooit meer seer te hê oor jou onvolmaaktheid nie, dis verby.

Jy is 'n oorwinnaar, jy is volmaak. Aanvaar dit net. ~ Willem Botha, 22/05/2024
Liewe ouers...
Ek sien so dikwels dat kinders geen respek het vir hulle ouers en hulle opvoeding nie. Kyk, 'n tiener is soms maar 'n wille ding en dit gaan rof in sommige huise, maar ek praat van volwasse mense wat hulle ouers steeds verag, al is dié al jare oorlede. Ek dink baie mense hou daarvan om hulle ouers te blameer vir hulle eie mislukking.
En ja, natuurlik is daar talle huishoudings waar die ouers se slegte gewoontes diep letsels los op kinders en ek het begrip daarvoor.
Maar ons lewens stap aan en met tyd kry mens meer en meer begrip vir die uitdagings wat ouers gehad het om hulle kinders groot te kry. Ek het al geskryf dat ek my pa se geboortegrond opgespoor het in Tonteldoos naby Dullstroom. Dis eers toe ek daar kon gaan stap en 'n gevoel gekry het van die bitter swaarkry waardeur hulle is, dat ek nog meer respek vir my pa gekry het.
Ek verlang deesdae nogal baie na my ouers, wat reeds lankal oorlede is . Ek verlang spesifiek na my ma se stem (en sy het altyd gesing), en die dinge wat sy altyd kwytgeraak het, en na my pa se manier van dinge doen, want hy het vir my vreeslik baie lewenswaarhede geleer sonder om veel te sê. Gelukkig het ek 'n goeie verhouding met my ouers gehad, maar ek sien sulke lelike goed tussen ouers en kinders gebeur. Die Here plaas so 'n groot klem op hierdie verhouding, dat dit in die Wet opgeneem is. Eer jou vader en jou moeder... Ek vind dit interessant dat daar nie ook staan "Eer jou kinders" nie. My mening is maar net dat ouers baie deurloop onder hulle kinders.
"As jy jou vader en moeder vervloek, is jou lewe daarmee heen en bly net die pikdonker oor." (Spr 20:20)
Ai, hoe sleg is dit nie. Op 'n mannekamp vertel 'n man vir my hoe sy seun hom vloek, terwyl hy die volwasse seun totaal onderhou en vir hom selfs 'n motor gekoop het, wat hy ook onderhou. Hoe tragies is dit nie. Maar dit gaan verder.
" 'n Seun wat sy pa mishandel en sy ma verstoot, is skaamteloos en veragtelik." (Spr 19:26)
Het jy al gesien hoe kinders hulle ouers op hulle ou dag verstoot? Hoe bejaardes onder hulle kinders se wrede tonge deurloop? Dis inderdaad veragtelik. Interessant dat soveel van hierdie mense dan ook uiters slegte verhoudinge het met hulle eie kinders.
Hoe wonderlik sou dit nie wees as ek my ouers net hierdie EEN aand by my kon hê, en hoe dit sou wees om hulle nog net EEN keer weer te kon vashou, en net weer EEN keer vir hulle te sê dat ek vir hulle lief is, want ek het dit te min gedoen. Ek is voorts so ongelooflik dankbaar dat my kinders nie aspirasies het om die land te verlaat nie, hoewel ek dit vir hulle 100% gun. Ons het hulle by die dag meer en meer nodig in ons lewe, en hulle is vir ons so 'n ongelooflike seën!
Eer jou vader en jou moeder, as jy hulle nog het. En wees goeie ouers vir jou kinders, as jy hulle nog by jou het. Jy sal nie glo hoe dit is as hulle weg is nie. ~ Willem Botha, 02/05/2024
Jy en jou Ventertjie  
Ek vang myself kort kort dat ek tob oor dinge van die verlede, en mense wat my op 'n tyd omgekrap het en wat steeds nou en dan in my kop kom plak soos 'n onwelkome plakker. Ek wat al soveel boodskappe geskryf het oor die houvas van jou verlede op jou toekoms, doen dit steeds aan myself om nie net te laat gaan nie. Hoeveel onnodige, lawwe stokou laste wil ek nou dra? Hoeveel onaangename herinneringe wíl ek nog soms gaan opdiep?
As mens die pad vat Kaap toe met 'n sleepwaentjie agter die motor kyk jy kort-kort in die spieël of Ventertjie nog kom. Daai waentjie is gelaai met alles wat jy nodig het, en slegs wat jy nodig het, want spasie is skaars. Maar gaan nou op toer met hierdie waentjie en jy laai in elke dorp goetertjies by, totdat jy naderhand onnodig swaar trek. So is dit in die lewe ook, dag vir dag laai jy "bagasie" by, totdat daardie waentjie 'n reuse las is. Daar is hordes dinge wat gemors in jou waentjie pak, jou verlede, dalk jou ouers, swak selfbeeld en baie ander dinge.
Maar daardie bagasie maak dood. Naderhand sleep jy nie meer die waentjie nie, hy stoot jou! En hy stoot jou net waar hy jou wil hê. Soms moet mens egter maar net stop en die ding afpak en kyk of daar nie 'n paar dinge uitgesmyt moet word nie. Die lewe is te swaar om nog gemors ook saam te sleep. Paulus het net die regte antwoord in Fil 3:13: "Broers, ek verbeel my nie dat ek dit alles al het nie. Maar een ding doen ek: ek maak my los van wat agter is en strek my uit na wat voor is." ~ Willem Botha, 30/04/2024

Hierdie is ons "happy place". Dis Phyllis Robertson tehuis vir gestremdes, en ons hou een Sondag per maand daar kerk. Dis só maklik om só lief te raak vir hierdie mense, want sulke opregtheid kry jy nie gereeld nie, want hierdie mense is sonder pretensies en sonder agendas. Ek probeer om dinge op te som wat ons daar ervaar, maar die gedagtes wat opkom sal boekdele beslaan, so ek noem net 'n paar. Die opregte, onwrikbare geloof, en geestelike diepte by vele van hierdie mense en selfs Bybelkennis is verstommend. Ons word elke keer met ope arms ontvang en daar is soveel dankbaarheid, dat ons uitsien om te gaan. Hulle hou van sing en hang aan ons lippe as ons die boodskap bring, en neem flink daaraan deel. Ek het 'n groot ding eendag besef. Hierdie mense is nie "besoedel" deur die "greed" na geld en aardse besittings nie, want hulle versorging is vir hulle genoeg. Ek dink as jy vir enige iemand daar R100 000 sou aanbied, sal hulle vir jou vra wat hulle daarmee moet maak!
Hulle vra nie net raad nie, hulle gee dit ook graag.
Interessant genoeg is omtrent die helfte van die mens daar nie met 'n gebrek gebore nie, maar is daar a.g.v. ongelukke of siekte toestande. Dit laat ons telkens besef jy nie alles net vanselfsprekend in die lewe moet vat nie.
Baie ongelowiges sal jou peper met vrae oor hoekom aardse teëspoed hulle soms tref, maar nie hierdie vriende van ons nie. Die meeste aanvaar hulle gestremdheid gelate, maar leef in dankbaarheid oor wat hulle steeds kan doen. Dis iets wat my dikwels skaam maak, omdat ek my oor strooi kan bekommer.
Ons besoeke daar is só opbouend en aangenaam, en besef elke keer hoe bevoorreg ons is. Ek weet nie altyd of ek so lief is vir die Here soos die meeste inwoners daar nie!
Mmm... is ons regtig bevoorreg? Is ons regtig "beter af"?
Ek wonder. ~ Willem Botha
Bereken die prys
Alles het 'n prys, elke besluit wat 'n mens neem, het een of ander koste, en dis dikwels ongelooflik duur. Weet jy wat is die probleem met genade? Ons verval in hierdie gedagte van: Jesus het mos klaar daarvoor gesterf.
En nou begin mens maar leef asof alles veroorloof is, en ons kan eintlik maar doen wat ons wil. En dis net daar waar die volstruis in die windpomp invlieg, want só dikwels besef ons hierdie goed eers as dit te laat is.
My punt is, ons kan nie net doen wat ons wil nie, want ons sal elke oomblik aan iemand moet verantwoording doen. Wanneer dit by dinge kom wat teen die Here se wil is, wil Hy 'n antwoord hê, maar dis nie al nie, want ons moet dikwels ook aan ons familie, of vriende verantwoording doen.
Maar die ergste is as jy aan jouself moet verantwoording doen, as daardie tyd aanbreek wat jy jouself verwyt oor jou besluite.
Maar weet jy wat? Die Here los jou nie net sommer om aan te gaan soos jy wil nie, want Hy sal elke oomblik denkbaar gebruik om jou aandag te kry, en soms sal dit bitter ongemaklik wees, en dit sal jou soms bykans breek. Nogal ironies dat ons dan die Here se weë bevraagteken. Hoekom Here? Hoekom kom hierdie goed oor my pad? Hoekom kasty U my so?
Dan sê die Here dalk, Ek is te lief vir jou om te sien hoe jy jouself en mense om jou te vernietig!
Ons sing graag daardie liedjie wat sê: Vorm my en maak my, net soos U wil... U is die Pottebakker en ek is die klei.
Maar ons sing dit maar met die gedagte dat die Here ons nou nie regtig in 'n vuurwarm oond moet druk nie.
"Daar is 'n lewenswyse wat vir 'n mens reg kan lyk, maar die uiteinde daarvan is die dood." (Spr. 16:25)
Ek sien nogal twee betekenisse in die woord "dood". Eerstens die Geestelike dood, waar ons nie die ewige lewe by God beërwe nie, maar tweedens ook die fisiese dood waar ons onsself vernietig weens swak besluite.
Alles het inderdaad 'n prys, wat beteken dat dinge baie sleg kan wees, maar andersyds kan dit ook 'n beloning wees, wat 'n wonderlike prys is om te kry.
Die Here gee nie op nie, Hy doen alles wat Hy kan om ons aandag te kry, maar dit hang van onsself af of ons betyds gaan reageer en ons lewenswyse wat tot die dood lei, te verander. ~ Willem Botha, 14/03/2024
 
Ons was nou nie dag op die begrafnis van ’n vriend. Daar word toe na hom verwys as ’n bastion vir sy gesin, familie en vriendekring. Hoe mooi is dit nie! Dit beteken hy was vir hulle ’n veilige hawe, ’n wegkruipplek, ’n skuilplek. Hy was vir almal ’n steunpilaar, ’n baken van hoop, ’n stewige anker, ’n bron van sekuriteit en krag. Almal kon na hom toe kom met hulle probleme en hy sou luister en raad hê en moed inpraat. Almal kon by hom aanklop en hy sou groot en klein met oop arms ontvang en sag met hulle werk. As jy by hóm was, gaan jy opgebou weg, voel jy ligter, is jy meer positief, sien jy kans vir jou pad. En nou is hulle bastion weg, in ’n oogwink, onverwags ... Val hulle lewe nou inmekaar? Gly hulle voete nou onder hulle uit? Dobber hulle nou rond soos ’n boot sonder anker? Nee! Hulle getuig nou dat God hulle ware Bastion is. Dié Een waar hulle nou skuil, waar hulle nou troos en raad en beskerming kry. Dié Een wat nou vir hulle die anker en hoop en krag is. Dié Een waarheen hulle nou vlug vir raad, dié Een wat nou hulle laste op Hom neem, wat hulle trane afdroog en hulle laat kans sien vir die lewe sonder hulle mens-bastion. Ek het net besef ons moet dié Bastion ken, ons moet die pad na Hom toe ken, ons moet naby Hom bly, ons moet die veiligheid van sy arms opsoek, ons moet ons hand in sy sterk hand hou, ons moet ons lewe op sy fondasie bou. Ons mens-bastions is verganklik, hulle blaas hulle asem maklik uit. “Die Here is my rots, my skuilplek en my redder, my God, my rots by wie ek skuil, my skild en sterk verlosser, my veilige vesting.” (Ps. 18:3) Dís God, ons Bastion. ~ Wilna Botha, 07/03/2024

Ek blaai netnou deur ou boodskappe en soek inspirasie vir 'n paar woorde, maar soms bly daai woorde net weg. Toe ek nou weer so "scroll" deur ou boodskappe, kom hierdie volgende boodskap, wat lank gelede geplaas was, weer op.
Hierdie gedagte draal deesdae weer gereeld in my kop, en ek oordink hierdie tendense gereeld. Wat my net weer laat besef dat mens vir die Here moet vra vir goeie onderskeidings vermoë, want ons as mense gryp meer en meer na oppervlakkige "teologie", want dis lekker om aan te kou, maar dit het soms geen diepte nie.

Kitskos
Daar is 'n lekker hamburgertjie daar by die groot M. Hy wag vir jou, hy is klaar gereed, dalk vanoggend al gemaak, of gister. Jy het skaars gestop en hy is reg vir die eerste happie, saam met daai lekker dun chippies. Jy vat die eerste hap voor jy in tweede rat is, en as jy by vyfde kom is hy geskiedenis. Hy proe na niks, hy ruik selfs na niks en hy doen ook vir jou niks, vernaam nie in terme van voedingswaarde nie. Maar dit maak nie saak nie, by die volgende dorp kry jy sommer nog enetjie. Partykeer is jy gelukkig dan kry jy sommer 'n speelgoedjie ook.

Jy kry sulke teologie ook, Kitskos-teologie.

Kom vanaand saam met my, daar praat 'n ou, en hy is vol van die Here, en boeta hy gooi net Skrif! Alles reguit uit die Bybel uit. Kyk, as daai man met jou klaar is seën die Here jou bonatuurlik. Partykeer blaas hy net op jou dan seën die Here jou, eensklaps. Hy gooi net Skrif, daai ou. Hy verkoop mooi video's ook, jy moet sommer die reeks koop. Hy vertel nuwe goed, jy sal verbaas wees.

Dalk voel jy vandag bietjie arm en daar is nie deurbrake in jou besigheid nie. En voel jy boonop effe olik? Kom ons stap gou deur die huis. Mmm... Hey ou, hierdie houtbeeld uit Afrika wat daar op die stoep hang, is jou probleem. Die een daar langs daai rolletjie wat aan die dak hang wat die vlieë vang! Dis daai ding man, hy maak jou arm! En siek. Hy kom uit Afrika uit, dinge uit Afrika is getoor, en hulle is baie sterk! Sterker as die Here! O koek, en daai stringetjie dingetjie uit die ooste ook. Dinge uit die ooste is boos! Maar moenie worry oor jou Toyota nie, en jou LG wasmasjien is ook okay. Nee wat, jy kan vergeet van seën, jy doen nie die regte dinge nie. Jy blok die seën, jy weet mos, die Here sê Sy volk gaan ten gronde weens 'n gebrek aan kennis!

Ai, hoe word ons nie meegesleur deur hierdie tipe goed nie. Wil jy iets beter eet? Lekker vaste kos? Wat van daardie bredie wat jou ma vir die hele dag op die stoof laat prut, daardie kossie met regte egte vleis in, as jy hom geëet het wéét jy jy het geëet. Die geur hang die hele dag deur die huis, dit het smaak, dis voedsaam en dit versadig. Dís mos nou kos, maar dit het tyd gevat. Soos wanneer ons besig is met Geestelike groei, soos wanneer ons besig is met die Here, elke dag, besig met Sy Woord, besig om Sy stem te leer ken. Dit vat tyd, jy ontwikkel onderskeidingsvermoë, jy word gevorm, soos die Pottebakker besig is om jou te verander in 'n bruikbare artikel, en jy hoor self Sy stem, jy hoef nie dit tweedehands te hoor nie. Met die tyd besef jy dat seën nie noodwendig 'n klomp geld in die bank beteken nie, jy besef dat Geestelike deurbrake nie iets te doen het met materiële dinge nie. Met tyd begin jy dankbaar word vir die klein dingetjies in die lewe, en dat jou voorspoed nie die belangrikste ding in die lewe is nie , want die lewe hierna is baie belangriker.

Soek daardie vaste kos, wag vir dit, wees dankbaar vir elke happie want dit kom jou nie noodwendig toe nie. Maar wie sal Hom kan keer as Hy besluit om jou te seën?

"Soos pasgebore kindertjies smag na melk, moet julle smag na die suiwer geestelike melk, sodat julle daardeur kan opgroei en die saligheid verkry." (1 Pet. 2:2)

Slaan die spyker op sy kop! Slap chips is lekker, maar goeie gesonde groente is beter. ~ Willem Botha, 04/03/2024

Hoe wonderlik as jy God se aangesig soek, en Hy sy aangesig oor jou laat skyn, en jy geborge voel in sy teenwoordigheid. Daardie tye wat jy weet dat niks jou uit sy hand kan ruk nie. Dis daardie tye wat jy besef dat jou volharding in geloof elke oomblik die moeite werd is.

Hoe verskriklik as jy sy aangesig verstoot en alles oor Hom vir jou net 'n aanstoot is. Daardie tye wat sy gesig ongevraag voor jou opdoem, omdat Hy nooit opgee met jou nie, en alles doen om jou aandag te trek. Dis tye wat soveel ongelowiges met mening probeer wegkom van Hom af, maar besef jy kan nie, want Hy is orals. En Hy gee nie op nie.

Hoe wonderlik is dit as jy in nood verkeer, en jy besef dat Hy ál is wat oor is, en die enigste plek waar jy vir hulp kan gaan soek, al moet jy soms lank wag vir 'n deurbraak.

Hoe verskriklik as jy self probeer om die mas op te kom, en niks werk nie, want jy weier om by Hom te gaan aanklop vir hulp, omdat jou trots te groot geraak het. En dan besef jy dat jou ongelowige meelopers, wat jou nuwe vriende geword het, absoluut nutteloos is en niks kan bied nie.

Hoe wonderlik as die geboorte van 'n baba jou opnuut met verwondering vul, en jy besef dat dit een van die grootse wonderwerke in die lewe is, en jy opnuut besef dat net God so iets moontlik kan maak.

Hoe verskriklik as jy verstok vashou aan wêreldse teorieë oor die skepping wat sê dat daar nie 'n God nodig is om alles tot stand te bring nie. Dis ook die tye waar die ongelowiges se verduidelikings 'n grap begin word, en niks daarvan water hou nie.

Hoe wonderlik om 'n nuwe dag te sien aanbreek en jou hart gevul word met dankbaarheid oor al die (soms piepklein) deurbrake wat jou met intense dankbaarheid vul. Dis die tye dat jy tog net vir God dankie kan sê, vernaam as jy lank gewag het vir daardie deurbrake.

Hoe verskriklik is dit nie as jy 'n emosie van dankbaarheid beleef, maar jy ontken dat daar Iets of Iemand groter as jy is, teenoor wie jy jou dankbaarheid kan uitstort.

Hoe wonderlik om die Bybel te lees en aanhoudend nuwe dinge te ontdek wanneer die Here dit aan jou openbaar. Die tye wat dit voel asof die Here so pas, vir die eerste keer, net vir jou, hierdie woorde neergepen het. En om te weet dat slegte dinge wat dalk vir jou mag voorlê, ook reeds aangespreek is in die Bybel, en dit wag vir jou om dit te ontdek.

Hoe verskriklik as die Bybel vir jou 'n aaklige dokument geword het wat jou net wil verdoem en veroordeel, omdat jy kies om net dít raak te sien wat jou ongelowigheid verder versterk.

Hoe wonderlik om te lees van Jesus se maagdelike geboorte, en jy wéét dat jy wéét dat dit die waarheid is. En om te lees van sy kruisiging wat gemaak het dat jy nie meer die ewige dood hoef te sterf nie.

Hoe aaklig is dit as jy die hele konsep van genade verwerp, en net raaksien dat die Here 'n wrede God is wat mense net wil vertrap, veroordeel en verwerp.

Hoe wonderlik om die Here aan te roep in gebed, selfs soms net in 'n versugting, en te weet dat Hy jou hoor, en boonop nog vir jou antwoord, dikwels net daar en dan, al oortuig Hy jou soms dat jy dalk net geduldig moet wag vir die uitkoms.

Hoe verskriklik om by die punt te kom wat gebed vir jou 'n leë, nuttelose aksie geword het wat beoefen word deur mense wat die kluts kwytgeraak het.

Hoe wonderlik om vanaand te gaan slaap met die wete dat Hy sy aangesig oor jou laat skyn, in jou slaap, en dat Hy met onbeskryflike liefde vir jou kyk terwyl jy onbewus daarvan in droomland is.

Die Here is groot en lief vir jou. Hoe wonderlik as jy dit besef en glo. ~ Willem Botha, 26/02/2024

Genadedood....
'n Uiters kontroversiële onderwerp, waarop ek nie per sé my opinie wil uitspreek nie, maar ek dink nogal baie daaraan. Is "lewe" heilig? Besluit God alleen of die mens mag lewe of nie? Binne watter raamwerke kan die mens self 'n besluit maak oor sy eie lewe? Wanneer mag uiterste lyding beëindig word deur die mens?
Ek glo jy was dalk ook al in 'n situasie waar jy gewonder het of die dood van 'n geliefde nie groot genade sou wees nie.
Passiewe genadedood is wettig, deurdat jy 'n sogenaamde "lewende" testament kan opstel waar jy jou wens uitspreek dat jy nie kunsmatig aan die lewe gehou wil word nie. Maar aktiewe genadedood is slegs in enkele land wettig, en dit is dan natuurlik onderworpe aan hordes reëls en regulasies.
Maar, as mens hieroor gesels, kan dit nogal 'n tameletjie word.
Ek vertel eers vir jou 'n storie, dan dink jy wat jy in dié situasie sou doen. Jare gelede was 'n vriend van my sterwend aan kanker en hy was al uitgemergel deur kanker behandeling, en hy was regtig op sy laaste. Ek het die aand by hom in die hospitaal gaan kuier, toe hy vir my die volgende sê : "Willem, bid asseblief NOU vir my dat die Here my vannag sal kom haal, ek sien regtig nie kans vir nóg 'n chemo sessie nie (die onkoloog wou weereens nog 'n rondte chemo doen). Bid asseblief dat ek vannag aan die slaap sal raak en nie more wakker word nie."
Wat sou jy doen? Sou jy daardie woorde gebid het in daardie omstandighede? As jy dit sou doen, sou jy probeer inmeng met God se wil oor lewe?
Ek het baie halfhartig 'n gebed gebid tot die strekking dat die Here die man se wil sal uitvoer. Maar hy het nie daardie nag gesterf nie, wel 5 dae later, presies soos wat hy begeer het. Hy het gaan slaap en nie weer wakker geword nie.
Waar trek mens die streep? Wat van 'n situasie waar 'n ouer persoon soveel pyn verduur dat hy/sy eerder die dood begeer? Is dit sonde?
Wel, kom ek vat jou nou na 'n baie groot probleem toe wat ons almal daagliks sien, indien jou opinie sou wees dat God alleen besluit oor lewe en dood.
Elkeen van ons het ál die nodige kennis om te weet dat jy jou dood kan versnel met slegte gewoontes. Is jou eie lewe dan steeds heilig? Durf ons vir die Here vra vir goeie gesondheid as ons self ons liggame verwoes? Geld al die redenasies dan steeds rondom die neem van 'n lewe? Vermoor mense hulleself nie dalk só maklik nie? Wat van hoë risiko sportsoorte? Wat van stres wat ons op onsself laai deur net te jaag na meer en meer materiële dinge? Baie mense sê hulle werk hulle dood, en dan kry hulle dit uiteindelik reg, ten kose van hulle families.
Die Bybel gee vir ons wonderlike riglyne oor hoe om 'n goeie gesonde, gebalanseerde lewe te lei.
Ek het nie antwoorde oor hierdie dinge nie, en my kop spring heen en weer oor dit.
Maar een ding weet ek, God wil die beste vir ons hê, maar ons het 'n reuse verantwoordelikheid teenoor onsself en ons geliefdes. ~ Willem Botha

Ek plaas hierdie volgende artikel wat iemand anders geskryf het verbatim:

Genadedood
Die afgelope tyd was daar heelwat gepraat en geskryf oor dié onderwerp. Wat is GENADEDOOD? Ek plaas hierdie artikel met die wete dat elkeen geregtig is op sy opinie.

Definisie:
HAT: ʼn Pynlose dood kunsmatig bewerkstellig uit meegevoel vir ʼn lyer aan ʼn ongeneeslike siekte. Dit staan ook bekend as eutanasie (eu = goed, wel; thanatos = dood; eutanasie = goed doodgaan). Dit verwys gewoonlik na die praktyk om ʼn lewe pynloos te beëindig.

Agtergrond:
Soos ander bio-etiese probleme kan ons nie genadedood in wetlike en wetenskaplike isolasie benader nie. Dit is nie ʼn suiwer mediese probleem per sé nie, maar ʼn morele probleem. Ons kan nie verwag dat geneeshere alleen hieroor moet besluit nie, alhoewel hulle ʼn definitiewe inset het om te lewer. Genadedood is deel van die debat tussen twee denksisteme in die wêreld:

(a) God het die mens geskep na sy eie beeld. Die reg om lewe te vernietig is dus God s’n. Selfs nie deernis vir iemand wat erge pyn ondervind, regverdig dit dat die mens ʼn lewe neem nie. As ons praat van genadedood praat ons in werklikheid van vals genade.

(b) Die mens het die reg om te kies wat met hom moet gebeur. As hy voel dat hy nie langer wil leef nie, is dit sy reg. In hierdie gevalle berus die keuse by die betrokke persoon of sy gesin. God speel geen rol in die keuse nie.

Geskiedenis:
Wat is die posisie van die geneesheer? Mense verwys na die Eed van Hippocrates. Hippocrates is in 5de eeu voor Christus op die Griekse eiland Kos gebore en is veral bekend vir hierdie eed. Hierdie is ʼn heidense eed, want hy begin deur te sweer by Apollo, Eskulapius en ander gode. In hierdie eed sê hy onder andere: Ek sal geen gevaarlike medisyne vir iemand gee as hy daarvoor vra nie; ek sal ook nie so iets voorstel nie. Die ou Grieke en Romeine het nie geglo dat lewe ten alle koste behou moet word nie. Hulle was nogal verdraagsaam ten opsigte van selfmoord deur mense wat sterwend was – Sokrates is ʼn goeie voorbeeld. Hy het gif gedrink voor hy tereggestel kon word.
Die beskikbaarheid van allerlei middels wat mense kan doodmaak, het die belangstelling in genadedood laat toeneem. Eutanasie-verenigings is in Engeland (1935) en die VSA (1938) gestig om aggressiewe genadedood te bevorder. In 1937 word genadedood in Switserland gewettig, mits die persoon wat die lewe beëindig, niks daaruit gaan baat nie.
Eugenetika (wetenskaplike ondersoek van alle faktore wat ʼn ras kan verbeter) was ʼn probleem in Nazi-Duitsland. Eksperimente is op mense uitgevoer. Onderliggend gaan dit oor die verbetering van die ras. Dit het begin by mense wat verstandelik erg gestrem was. Daarna kom die T4-program van die Nazi’s – dit begin met kinders onder die ouderdom van 3 jaar wat geestelik of fisies gestrem was; dit word later uitgebrei na ouer kinders; later na inrigtings waar mense met geestesongesteldhede aangehou is. Laastens word dit uitgebrei na die konsentrasiekampe. Nou was die slagoffers nie meer mense met gestremdhede nie, maar Jode.
As gevolg van hierdie Nazi vergrype ontwikkel daar ʼn sterk stem teen genadedood na die Tweede Wêreldoorlog. Sedertdien verander baie lande hulle siening in die sin dat hulle meer toegeeflik word. ʼn Goeie voorbeeld is Terri Schiavo. Sy het in Florida in die VSA gewoon. Teen 2005 was sy reeds 15 jaar bewusteloos. Sy word met ʼn maagbuis gevoed en so aan die lewe gehou. Haar man nader die hof met die versoek dat die maagbuis verwyder moet word. Die res van die familie (ook haar ouers) was daarteen gekant. Hy slaag met sy aansoek in die hof; die buis word verwyder en sy sterf kort daarna.

Die wetlike posisie:
Mense se sienings oor genadedood wissel baie – van moord tot genade/verlossing. Aktiewe genadedood is onwettig in Suid-Afrika en in meeste ander lande. Die pasiënt het wel die reg om medisyne te weier – al lei dit tot sy dood. Hierdie situasie is besig om baie vinnig te verander. Baie lande is besig om hulle wetgewing aan te pas om genadedood moontlik te maak. Sommige vorme van genadedood is wettig in België, Luxemburg, Nederland, Switserland, Thailand, en die staat Oregon in die VSA.

Hoekom kry ons hierdie versagting van ons houding teenoor genadedood? Hoekom laat meer lande dit toe? Hoekom steun meer mense genadedood? Daar is veral drie faktore wat hier ʼn rol speel:

(a) Aanvanklik het die heiligheid van lewe ʼn deurslaggewende rol gespeel, maar in die moderne samelewing is die kwaliteit van lewe bepalend. Genadedood is dus ʼn optrede van deernis.

(b) Die klem op die reg van die mens om self te besluit – ook oor sy eie liggaam. Dit is ʼn argument wat ons ook in die aborsie-debat kry.

(c) Die samelewing se vrees vir oud word en die dood.

Hierdie artikel is deur Coen Slabber, op Bybelkennis.co.za geplaas.
Slangetjies en leertjies.
Ek is seker jy het hierdie bordspeletjie hordes kere as kind gespeel. Die doel van die speletjie is om eerste by die eindpunt uit te kom, maar soms is jy gelukkig en jou merkertjie beland gereeld op 'n leertjie en jy vorder vinnig tot by die eindpunt. Maar o wee, met my geluk beland ek kort kort op 'n slangetjie en dan is ek maar weer net waar ek begin het.
Is die lewe nie ook maar so nie? Party mense tref net altyd die goeie geluk, maar ander nie. Die lewe is op en af, en soms gaan dit vir jare klopdisselboom, en dan eendag, uit die bloute tref 'n tragedie of slegte omstandighede jou en dan voel dit of jy reg van voor af moet begin. Dit lyk my ons het nie altyd al die keuses nie, maar dat buite faktore 'n groot rol speel.
"Verder het ek in hierdie wêreld gesien: dit is nie die vinnigstes wat die reisies wen nie, nie die sterkstes wat die oorlog wen nie, nie dié met wysheid wat kos het nie, nie die verstandiges wat ryk word nie, nie dié met kennis met wie dit goed gaan nie. Alles word bepaal deur tyd en geleentheid."(Pred. 9:11)
Dit sê verseker nie dat God nie in beheer is nie. Maar ek lees hierin raak dat die Bybel voorsiening maak daarvoor dat omstandighede 'n rol speel in ons daaglikse lewe. Die vraag is nie of slegte dinge op jou pad gaan kom of nie, maar of jy bereid is om verder te speel en weer op te staan as jy platgeslaan is. Saam met God kan jy altyd weer begin, as jy wil. ~ Willem Botha, 15/02/2024
Is die Here in ons diens? Hoef Hy te verduidelik waarmee Hy besig is? Hoef Hy Homself te verdedig teen mense wat hulle geloof verloor het en wat alles wat Hy doen of sê in twyfel trek? Hoef Hy te verduidelik as mense so graag sê dat die Bybel homself weerspreek? Hoef Hy te antwoord as mense hulleself so vreeslik slim hou en dink hulle is verhewe bo Hom? Hoe arrogant kan mense nie raak nie, en hoe roekeloos kan hulle nie word nie. Wat is die mense per slot van rekening, die mens wat sy asem so maklik uitblaas en so maklik hulpeloos en hopeloos kan word?
Ek is seker jy word ook dikwels daarmee gekonfronteer, en dan voel dit of mense met hulle geykte redenasies die oorhand oor jou kry, en dat jy net eenvoudig nie antwoorde het nie. Vernaam as mense jou in 'n hoek druk met woorde soos: hoe kan 'n liefdevolle God sulke dinge toelaat? Ja, natuurlik het ek ook nie altyd antwoorde nie, maar ek sal nooit toelaat dat so iemand my laat twyfel in God nie.
Nou ja, Job het 'n goeie bloutjie geloop toe Hy ook die Here probeer aanvat het.
Toe het die Here vir Job aangespreek uit 'n stormwind uit: “Wie is dit wat besig is om my bedoelinge te dwarsboom met woorde wat getuig dat hy geen insig het nie? Maak jou reg vir die stryd: Ek sal vra, antwoord jy My. Waar was jy toe Ek die aarde se fondamente gelê het? Praat as jy die antwoord het. Wie het die aarde afgemeet? Weet jy dit? Wie het 'n maatlyn oor hom gespan? Waarop is sy voetstukke neergesit? Wie het hom aanmekaargesit, daardie oggend toe die sterre saamgesing het en al die hemelinge gejubel het? Wie het die see opgedam toe hy begin uitborrel het? Ek het hom met wolke bedek, hom met donkerte toegemaak. Ek het vir hom perke gestel, hom agter slot en grendel gesit. Ek het gesê: ‘Tot hiertoe mag jy kom, nie verder nie; hier is die grens van jou magtige golwe.’ “Het jy, Job, in jou tyd die môre beveel om te kom? Weet jy waar die daeraad vandaan kom? Die daeraad wat lig oor die hele aarde bring sodat die goddeloses nie in die donker kan bly skuil nie?" (Job 38 : 1-13)
Hierdie volgende woorde van die Here spreek boekdele! “Wie is dit wat besig is om my bedoelinge te dwarsboom met woorde wat getuig dat hy geen insig het nie?”
Maar in hoofstuk 39 blaas Job die aftog.
Job het toe vir die Here gesê: “Ek is nie opgewasse teen U nie. Hoe sou ek U kon antwoord? Ek sal liewer stilbly. Ek het gepraat, maar ek kon nie 'n antwoord vind nie, ek het weer geprobeer, maar nou sal ek stilbly.” (Job 39 : 36 - 38)
Ek het al menigmaal in my lewe eintlik dieselfde gedoen, maar ek het net besef Hy is soewerein en Hy weet die beste. Ek volstaan ook maar eerder met Job se woorde:- "... maar nou sal ek stilbly" ~ Willem Botha, 05/02/2024
Willem stuur vandag vir ons gesin ’n skermgreep, wat hy êrens gesien het. Dit sê dat dit vandag, 1 Februarie, wêreldoptimis dag is. Dit sê daarby dat die doel van die dag is om vir mense die kans te gee om eerder die glas as half-vol te sien teenoor half-leeg, om te fokus op die positiewe kant van ’n saak, to look at the bright side! Ai hoe wonderlik sou dit wees as die hele wêreld régtig vir vandag optimisties kon wees. Meer nog, hoe wonderlik sou dit wees as ons as Christene vandag optimisties kon wees. Of nóg beter: as ons elke dag optimisties kon wees. “Optimism is an attitude reflecting a belief or hope that the outcome of some specific endeavor, or outcomes in general, will be positive, favorable, and desirable.” – dis die definisie van optimisme, aldus Wikipedia. Daar is só baie aanhalings oor optimisme en oor ’n positiewe ingesteldheid. Ek hou daarvan om dit te lees en myself te probeer motiveer en inspireer om méér optimisties te wees. Dis ook goed vir my om swartgallige mense te probeer vermy en die geselskap op te soek (in lewende lywe én op plekke soos Facebook!) van positiewe mense, met ’n optimistiese uitkyk, mense wat hoopvol is en verby die lelike, verby die probleme, verby die gemors na die mooi in alles soek (en vind!) en daai optimisme deel in hulle getuienis én wys in hulle lewe. Vir ons as Christene is optimisme eintlik meer as net positiewe denke, dis gesetel in die hoop wat ons het. Ons positiewe denke is vasgeanker in iets ewig en onveranderd, in Iemand wat die toekoms ken, wat die heelal in sy hand hou, wat sy beloftes nakom. “Daarom moet ons aanhou om die dinge to glo en te sê wat ons hoop, ons moenie daaroor twyfel nie. Ons kan baie seker wees daarvan omdat God dit belowe het en Hy sal doen wat Hy belowe het.” (Heb. 10:23, Bybel vir almal-vertaling) Sonder ’n persoonlike verhouding met Jesus, sonder vertroue in Hom, sonder geloof in die onveranderlike liefde en getrouheid van God, sonder die beloftes en aanmoediging en bemoediging uit die Woord, is egte, langdurige optimisme seker nie moontlik nie. My dogter het dié aanhaling op die foto aan die begin van die jaar met ons gedeel en gesê dit gaan hierdie jaar haar motto wees. Ons het dit toe sommer vir ons ook aangeneem en vir ons elkeen so ’n bordjie gemaak. Dit pas nogal mooi in by wêreldoptimis dag!
“Mag God, die bron van hoop, julle deur julle geloof met alle vreugde en vrede vervul, sodat julle hoop al hoe sterker kan word deur die krag van die Heilige Gees!” (Rom 15:13) ~ Wilna Botha, 01/02/2023
Met niks...  
Met niks het jy in die wêreld gekom, en met niks gaan jy daaruit. So het Job ook gesê in Job 1:21. Jou aardse skatte het nét waarde terwyl jy asemhaal. As jy gebore word, besit jy per definisie heeltemal niks, tensy jy in 'n stewige erfporsie in gebore word. Andersins besit jy die kleertjies wat jou ma gekoop het, en die fopspeen is waarskynlik ook net joune. Maar met tyd verjaar jy en kry jy geskenke en dis die totaal van jou besittings. Eventueel sal jy begin inkomste verdien, en dan begin jou besittings meer word, maar dan begin snaakse goed gebeur. Iemand het eendag hierdie ware woorde kwytgeraak. Jy werk en swoeg en sweet meesal om een van twee redes: Uit vrees (dat jy dalk dít sal verloor wat jy besit), of uit gierigheid. Daar steek nogal waarheid daarin. Al hierdie weelde en besittings het vir jou persoonlik 'n baie kort lewe, dit bestaan immers net tussen jou geboorte en sterfdatums. 'n Jong man het eendag vir my gesê dat hy hard gaan werk en goeie besigheid doen en aftree op veertig, maar ek het net my kop geskud. Vader Tyd het hierdie jong man hopeloos ontnugter, want hy het op sy beplande "aftree" ouderdom absoluut niks besit nie.
Kyk na hierdie wyse woorde wat in Prediker opgeteken staan:
"Wat die mens het, is beter as wat hy begeer. Ook hier kom dit tot niks. Dit is 'n gejaag na wind."  (Pred 6:9)
Watter ongelooflike waarheid is hierdie nie. "Wat die mens het, is beter as wat hy begeer". 'n Baie welaf man het eendag gesê: “Leer om tevrede te wees met wat jy het, want ek beweeg tussen die rykstes van die rykes, en ek ken nie een wat genoeg het nie.”
Sjoe, ons almal soek meer, maar die Here sê hier baie duidelik dat begeer niks goeds inhou nie. Oordadige rykdom is nie vir almal beskore nie, en daar kom ongelukkig soms ander dinge daarmee saam wat ek en jy nie noodwendig kan hanteer nie.
Diegene wat in tevredenheid kan leef met wat hy het, slaap goed in die nag, maar die wat altyd meer begeer doen soms verkeerde dinge om daardie begeertes te bevredig.
"Liewer 'n stukkie droë brood met vrede daarby as 'n huis vol kos met 'n getwis daarby." (Spr. 17:1) ~ Willem Botha, 29/01/2024
"When all the odds are stacked against you..."
Ek lees hierdie frase onlangs in 'n boek en dit het my diep laat dink. Elke mens het uitdagings, elke dag, en daar kan hordes goed wees wat mense magteloos maak. Ek dink as ek moet raai, sou ek sê dat die breë bevolking meesal met die volgende dinge sukkel: gesondheid, finansies, verhoudinge wat skeefloop, eensaamheid, 'n gevoel van nutteloosheid, hooploosheid, depressie ens.
Maar dis sleg as die lig in die tonnel totaal weggeraak het, en dit voel of alles teen jou draai.
When all the odds are stacked against you...
Miskien klink dit maar weereens net na leë, geykte woorde as mens sê dat jy net na die Here toe kan vlug.
" 'n BEDEVAARTSLIED. Ek slaan my oë op na die berge: waar sal my hulp vandaan kom?" (Ps. 121:1)
Die woord bedevaartslied is so mooi woord. Dit klink na 'n gebed in 'n liedvorm, iets wat jy kan sing in jou nood. Is dit nie amper ondenkbaar nie? Dat jy sing in jou nood? Soos Paulus en Silas in die tronk.
Ek kyk op na die berge, ek slaan my oë op na die Here toe. Na wie anders as dit voel of álles, en álmal hulle rug op jou gedraai het? Jy weet mos, as groot moeilikheid jou tref, raak jy bitter eensaam, want vriende verdamp soos mis voor die son.
En so maklik dink ons die Here het ook sy rug gedraai, maar dit kán nooit waar wees nie. Ek hou so van die gedagte dat dít die tyd is wat jy maar net eenvoudig in die Here se arms terugsak, en om totaal oor te gee. Of om op sy skoot te klouter en vir Hom te vra om jou net vas te hou. As 'n kind seerkry, is daar geen groter vertroosting nie as om net in sy ouers se sterk arms te gaan skuiling soek. In sulke tye is dit die beste om op te hou om teen die omstandighede te veg, en net oor te gee. Die meeste storms bedaar weer, weet jy? Die meeste storms hou nie vir altyd aan nie, maar ja, soms laat 'n storm skade agter. Maar ook daar is die Here se hand beskikbaar om te help.
Ek is ook al deur storms, maar tydens nie een van daardie storms het die Here sy rug gedraai nie, en die meeste mense kom sterker aan die ander kant uit. En voorts gebeur dit dat mense selfs vir die Here dankie sê (ek het ook), want daardie soete oorwinning is soms daai storm werd, al klink dit na 'n sinnelose gedagte. Moenie jou nét blindstaar teen die donker tonnel nie, slaan eerder jou oë op na waar God is. Waar anders sal jou hulp vandaan kom? ~ Willem Botha, 25/01/2024

Ek was vandag weer in die teenwoordigheid van iemand wat net ánders is – vriendelik, rustig en kalm, sy praat só mooi en positief en belangstellend met almal. Iemand wat mens inspireer, iemand wat jou nie onaangeraak laat nie. Dit was nie iemand wat ek ken nie. Om die waarheid te sê dis iemand wat in ’n winkel werk, iemand wat teen vyfuur die middag, ná die hele dag se werk, alle rede gehad het om dalk nie meer so vriendelik te wees nie. Ek het gewonder wat dit is wat haar anders maak. Toe besef ek daai “iets” in haar is heel waarskynlik God se lig wat uit haar straal. Sy het nie haar lig onder ’n emmer, in ’n kelder of onder die bed gesit nie, maar op ’n lampstander sodat dit vir almal om haar lig gee. Haar lig is nie uitgedoof deur die dag se probleme, deur moegheid of veroordeling nie; dis nie uitgedoof deur ander mense se negatiwiteit of onbeskoftheid nie – dit het net geskyn omdat dit is wie sy is. Ek wil meer só wees. Ek wil hierdie ter harte neem: “Pas dus op dat die lig in jou nie donker is nie. As jou hele liggaam verlig is en nie ’n enkele donker plekkie het nie, sal dit heeltemal verlig wees soos wanneer ’n lamp jou met sy skynsel verlig.” (Luk. 11:36) Ek wil dít doen, want lig verdryf donkerte en net miskien kan ek help om ’n skynsel lig in iemand se dag te bring. Ek wil dít  doen, want dit sal God verheerlik: “Julle moet soos ’n lig in hierdie pikdonker wêreld skyn. Ander mense moet uit julle woorde en dade sien dat julle God van harte dien. Dan sal hulle sê dat God regtig ’n groot en goeie God is. So word julle hemelse Vader se Naam regtig grootgemaak.” (Matt. 5:16, Die Boodskap) ~ Wilna Botha, 23/01/2024
Wie is God dan regtig?
Mens hoor by Christene van 'n liefdevolle God wat nét die beste vir jou in gedagte het. Maar by ongelowiges hoor jy dat Hy 'n kwaai God is wat jou elke dag wil straf en jou lewe miserabel maak. Hoekom verskil hierdie partye so van mekaar? Ek dink ek het uiteindelik 'n redelike verduideliking vir hierdie dilemma vir myself uitgemaak.
Ek het einde verlede jaar weer begin om die Bybel van voor tot agter deur te lees in een jaar, aan die hand van die sogenaamde "Eenjaar Bybel". Jy lees elke dag een deel uit die ou Testament, 'n deel uit Psalms, 'n deel uit die nuwe Testament en 'n stukkie uit Spreuke. Dan is daar ook kort kommentare daarby. Tien minute se lees per dag neem jou deur die hele Bybel in slegs een jaar. Die leesgedeeltes begin eenvoudig voor in die ou Testament, sowel as voor in die nuwe Testament, een stukkie van elk direk na mekaar.
As jy hier by Exodus tot Numeri kom, begin jy jou vasdraai in hierdie onmoontlike wette en reëls wat die Here deur Moses aan die volk deurgegee het. Dis regtig VERSKRIKLIK moeisaam om deur dit te worstel, en dit klink onmoontlik om die Here te behaag. Maar omdat niemand dit kon regkry nie, moes daar die hele tyd offers gebring word. En die Here is onbeskryflik streng, en dit was vir die volk niks vreemd om dikwels mense met klippe dood te gooi nie. As jou kind jou vloek moet jy hom doodmaak!!! Ek verstaan hoekom die volk Hom as kwaai en liefdeloos ervaar het. Maar terwyl jy lees, kom die stukkies uit die nuwe Testament op, en dis 'n totale ander prentjie, dit klink selfs na 'n ander God! My emosies ry elke aand wipplank tussen die gedeeltes wat jou só afrem, dat ek dit soms nie wil lees nie, teenoor 'n liefdevolle Jesus wat met groot deernis mense genees het, en hope liefde op almal uitgestort het. En wanneer jy begin agterkom dat Hý die finale offer gebring het deur te sterf aan die kruis, besef jy regtig wat die prys van daardie liefde was.
Nou, ja, dis waar die verskil inkom by mense. As jy nie vir Jesus aangeneem het nie, sál jy vassteek by die gedagte van 'n wrede, liefdelose God, maar as jy Hom aanvaar as jou Redder, kan jy eenvoudig nie anders as om nét liefde te ervaar nie. En God die Vader? Hoe sien ons sy liefde raak?
“God het die wêreld so liefgehad dat Hy sy enigste Seun gegee het, sodat dié wat in Hom glo, nie verlore sal gaan nie maar die ewige lewe sal hê. " (Joh. 3:16)
As dít nie liefde is nie! Dink aan jou eie kind, sal jy hom/haar aan 'n kruis gaan vasspyker vir ander se redding? Dik wrede spykers deur jou babatjie se polse?
Maar hoekom kan almal dan nie hierdie situasie insien en aanvaar nie? Die antwoord daarvoor is ook in die Bybel.
"Die mens wat nie die Gees van God het nie, aanvaar nie die dinge van die Gees van God nie. Vir hom is dit onsin. Hy kan dit ook nie verstaan nie, omdat dit geestelik beoordeel moet word."  (1 Kor. 2:14 )
Dis die probleem, mense weerstaan die Gees, en bly daarom verlore. Maar Hy hou nooit op roep en soek na mense nie.
"Kyk, Ek staan by die deur en Ek klop. As iemand my stem hoor en die deur oopmaak, sal Ek by hom ingaan en saam met hom die feesmaal hou, en hy saam met My." (Open. 3:20) ~ Willem Botha, 17/01/2024
Op die laaste dag van 2023 sing ons hierdie woorde in die kerk: “... Your goodness is running after me” en net daar besef ek ek kan die nuwe jaar met vrymoedigheid betree, want waar ek gaan wees,  wat ook al op my wag, die Here is daar en sy goedheid en guns sal my volg, dit sal agter my aanhardloop, dit sal my vind, dit sal genoeg wees vir elke dag in die nuwe jaar. Ps. 65:12 sê so mooi: “U kroon die jaar met U goeie gawes. Waar U ook gaan, is daar oorvloed!” (Ps. 65:12) Ek is oortuig daarvan dat die Here ons elkeen se jaar ook só sal kroon en dat sy goeie gawes in oorvloed op ons as sy kinders sal neerreën in hierdie nuwe jaar. Mag jy dit druppel vir druppel raaksien en op jou vel voel en mag jy sien hoedat sy goedheid jou agtervolg! ~ Wilna Botha, 11/01/2024

Toe breek hy aan, sommer net so. Dis nou die jaar 2024 en weereens skud dit ons so bietjie dat die jare so flink aanstap. Kan jy onthou wat jy gedoen het op 31 Desember 1999? Daardie middernag het die jaar 2000 aangebreek, en soos met enige groot mylpaal was daar geweldige onsekerheid oor die toekoms. Wat hou hierdie nuwe millennium vir ons in? Gaan Suid-Afrika staande bly? Gaan óns staande bly? En so wil ons ook weet van 2024. Gaan ons staande bly?
Die antwoord is natuurlik onomwonde JA!!! Hoekom nie? Is jou gô nou skielik uit? Nee man, wees opgewonde, want soos my dogter tereg vra: Wat is die beste wat kan gebeur?
'n Vriend deel 'n artikel met my oor die statistieke van die "Youversion family of apps", wat die Bybel app insluit. Dis verstommend hoeveel miljoene keer die Bybel jaarliks wêreldwyd afgelaai word, en hoeveel spesifieke tekste deur mense gesoek en gedeel word.
Sommiges sal jou vertel dat die Bybel uitgedien raak, maar statistieke vertel 'n ander storie. Wat my hart egter warm gemaak het, is die teks wat in 2023 die meeste gedeel en afgelaai is.
"Wees nie bevrees nie, want Ek is met jou; kyk nie angstig rond nie, want Ek is jou God. Ek versterk jou, ook help Ek jou, ook ondersteun Ek jou met my reddende regterhand." (Jes. 41:10)
Voorts kon "Youversion" 200 nuwe weergawes van die Bybel, in meer as 100 tale, beskikbaar stel.
Wel, as jy wonder of daar 'n God is in wie se vertroue jy jouself kan stel, bewys hierdie statistieke dat die Here kliphard aan die werk is. Hierdie is nié net die werk van mense nie.
Terloops, Youversion is boonop gratis.
Ons webblad, www.heuning.co.za, het vanaf 2008 tot nou bykans 410 000 besoeke gehad. Vir my is dit nog ’n aanduiding dat mense aan die Here vashou, dat mense op sy beloftes vertrou en die geskrewe Woord ernstig opvat. Daarom kan ek en jy dit ook doen vir 2024. Hy het nie weggegaan nie, Hy is nie nou eers terug by die werk van vakansie af nie, Hy het nie nodig gehad om bietjie te gaan rus nie en sy beloftes aan jou en sy liefde vír jou, staan rotsvas.
Ons gaan voort met Heuning, ons plaas weereens gereeld boodskappe en ons kuier heerlik saam met jou op hierdie platform.
2024, hier is ons, ons stap aan en ons sien uit daarna. Hoekom nie? Wat is die beste wat kan gebeur? ~ Willem Botha, 09/01/2024

Klik hier vir nog meer heuningdruppels >
Duplisering en verspreiding word toegelaat sonder veranderinge en met verwysing na die outeur en webruimte (www.heuning.co.za)